تقرير الإنتهاك : ماهر جرجس توفيق

تفاصيل الإنتهاك

اللي في الصورة ده ماهر جرجس توفيق، ماهر يبقى زوج اختي و اب لأربعة اطفال في مراحل عمرية مختلفة اكبرهم في 3 اعدادي ماهر عنده محل حلاقة جاله واحد بلطجي عايز ياخدمنه اتاوة 1500 جنيه و لما ماهر رفض قام البلطجي كسر قفل المحل و اتصل بيه و قاله كده المبلغ بقى 5000 . كان عايز ينزل لكن مراته منعته من النزول يومين علشان خايفة عليه. ماهر قال لمراته تعالي نخرج شوية انا بقالي يومين مخرجتش، اخد مراته و الاولاد و ركبوا العربية يتفسحوا شوية و بعدين جه عند قسم الشرطة قالها استنيني نص ساعة هنزل اعمل محضر بعدم التعرض و ارجعلك. ماهر خرج من القسم جثة هامدة بعد ما عذبوه و قتلوه و الصور خير دليل على ما اقوله مش بس كده مجموعة من الضباط كلموا اخواته على جنب و هددوهم انهم لو طلبوا تشريح او قالوا انهم قتلوه في القسم هيلبسوهم قضايا وكيل نيابة بني سويف اسمه احمد عبد الهادي ضغط كتير على مراته انه يستخرج تصريح دفن بدون تشريح لكن مراته رفضت و لما رفضت و اصرت ان لازم يتشرح للوقوف على سبب الوفاة قرر انه يعاقبها و يخليها تحضر التشريح بنفسها بشرط انها ما تبكيش او تعمل اي صوت و بالفعل دخلت و حضرت التشريح بنفسها. -عايزين حق ماهر و حق اطفاله اللي اتحرموا منه - مش عايزين اي مندوب من الكنيسة علشان مش هنتنازل - لابد من تقديم الجاني لمحاكمة عادلة - اثبتولنا اننا عايشين في دولة قانون تحت ظل عدالة و مساواة و ليست دولة قمع داخل الاسوار و بلطجة خارج الاسوار.. اثبتولنا اننا مش في غابة .